ຂປລ.​ ໃນ​ວັນ​ທີ 17 ສິງຫາ 2017, ຫ້ອງ​ວ່າການ​ສຳນັກງານ​ນາຍົກລັດຖະມົນຕີ ​ໄດ້​ມີ​ແຈ້ງ​ການ ​​ໃຫ້​ລັດ​ວິ​ສາ​ຫະກິດຫວຍ​ພັດທະນາ​ລາວ ຫລຸດຜ່ອນ​ການ​ອອກ​​ເລກ​ຫວຍ ຈາກ 2 ຄັ້ງ​ຕໍ່ອາທິດ​ໃຫ້ຍັງ​ເຫລືອ 1 ຄັ້ງ​ຕໍ່ອາທິດ, ​​ໃຫ້​​ຮັບປະກັນ​ຄວາມ​ໂປ່​ງ​ໃສ ໃນ​ການ​ອອກ​ຫວຍ​ລາງວັນແຕ່ລະຄັ້ງ ​ໃຫ້​ແກ່​ຜູ້​ສ່ຽງ​ໂຊກ​ຊິງ​ລາງວັນ, ​ໂດຍ​ມອບ​ໃຫ້​ກະຊວງ​ການ​ເງິນ ​ຊີ້​ນຳການ​ປັບປຸງ​ໂຄງ​ປະກອບ​ການຈັດ​ຕັ້ງ ​ແລະ ບຸກຄະລາ​ກອນ ​ຂອງ​ລັດ​ວິ​ສາ​ຫະກິດ​ດັ່ງກ່າວ ​ໃຫ້​ກະທັດ​ລັດ ​ແລະ ​ເໝາະສົມ ​ເພື່ອ​​ເຮັດໃຫ້ການ​ເຄື່ອນ​ໄຫວ​ດຳ​ເນີນ​ທຸລະ​ກິດ​ມີ​ປະສິດທິ​ຜົນ.

ທ່ານ ​ເພັດ ພົມ​ພິພັກ ຫົວໜ້າຫ້ອງ​ວ່າການ​ ສຳນັກງານ​ນາຍົກລັດຖະມົນຕີ ລະບຸ​ວ່າ: ນອກຈາກ​ການ​ຫລຸດຜ່ອນ​ ການ​ອອກ​ເລກ​ລາງວັນ​ເລກ​ຫວຍ​ແລ້ວ ຍັງ​ຕ້ອງ​ໃຫ້​ຢຸດ​ເຊົາ​ການ​ເຄື່ອນ​ໄຫວ ​ດຳ​ເນີນ​ທຸລະ​ກິດ ຫວຍທວາຍ​ຜົນ​ບານ​ເຕະ ​ແລະ ທຸລະ​ກິດ​ຫວຍ​ເອສ​ເອັມ​ເອສ, ສຳລັບ​ຜະລິດ​ຕະພັນ​ຫວຍ​ທີ່​ໄດ້​ຮັບ​ອະນຸຍາດ​ໄປ​ແລ້ວ ​ແຕ່​ບໍ່ທັນ​ໄດ້​ເຄື່ອນ​ໄຫວ ​ຄື: ຫວຍ​ບົງ​ໂກ້ ​ແລະ ຫວຍ​ໂລ​ໂຕ ​ແມ່ນ​ໃຫ້​ຍົກ​ເລີກ​ໃບ​ອະນຸຍາດ, ສ່ວນ​ຫວຍ​ຂູດ ​ແມ່ນ​ໃຫ້​ສື​ບຕໍ່ຈຳໜ່າຍ ສະ​ເພາະ​ຈຳນວນ​ທີ່​ໄດ້​ຈັດ​ພິມ​ຕົວ​ຈິງ, ​ແຕ່​ໃຫ້​ຈຳກັດ​ສະຖານ​ທີ່ ​ແລະ ປະລິມານລົງ​ໃຫ້​ເໝາະສົມ ​ເມື່ອ​ຂາຍ​ຈຳນວນ​ເກົ່າໝົດ​ແລ້ວ ​ໃຫ້​ສະຫລຸບ​ລາຍ​ງາຍ​ຕໍ່ລັດຖະບານ ​ເພື່ອ​ຂໍ​ທິດ​ຊີ້​ນຳ​ໃນຕໍ່ໜ້າ.

🙏ທີ່ມາ : @Tholakhong

-------------------------

Facebook : Perdjai

Instagram : Perdjai

www.perdjai.com